ഒരു വലിയ കാടിനോട് ചേർന്നുള്ള ഗ്രാമത്തിൽ രാവി എന്ന ഒരു കള്ളൻ താമസിച്ചിരുന്നു. മറ്റുള്ളവരുടെ സാധനങ്ങൾ മോഷ്ടിച്ച് അടുത്തുള്ള പട്ടണത്തിൽ വിൽക്കുക എന്നതായിരുന്നു അവന്റെ രീതി. ഒരു ദിവസം ഗ്രാമത്തിലെ ക്ഷേത്രത്തിൽ തൂക്കിയിട്ടിരുന്ന വലിയൊരു ചെമ്പ് മണി അവൻ കണ്ടു. 'ഇത് മോഷ്ടിച്ചാൽ ഒരുപാട് കാലം എനിക്ക് പണമുണ്ടാക്കാം' എന്ന് കരുതി അവൻ ആ മണി മോഷ്ടിച്ചു.
കാട്ടുപാതയിലൂടെ മണി തൂക്കി നടക്കുമ്പോൾ അത് 'ടിംഗ്... ടാങ്ങ്...' എന്ന് വലിയ ശബ്ദമുണ്ടാക്കി. ഈ ശബ്ദം കേട്ട് കാട്ടിലെ ഒരു പുലി ഉണർന്നു. ദേഷ്യം വന്ന പുലി രാവിയെ പിടിക്കാൻ ഓടി. പേടിച്ചുപോയ രാവി, മണിയുടെ ഭാരം കാരണം വേഗത്തിൽ ഓടാൻ കഴിയാതെ വന്നപ്പോൾ, മണി അവിടെ ഉപേക്ഷിച്ച് കാട്ടിലേക്ക് ഓടി ഒളിച്ചു.
അപ്പോൾ അവിടെ വന്ന കുരങ്ങൻ സംഘം ആ മണി കണ്ടു. അവർ അത് അടിച്ചു നോക്കി. ആ ശബ്ദം അവർക്ക് വലിയ ഇഷ്ടമായി. ഒരു കുരങ്ങൻ മണി എടുത്ത് ഗ്രാമത്തിന് അടുത്തുള്ള ഒരു വലിയ മരത്തിന്റെ മുകളിൽ കൊണ്ടുപോയി ഇരുന്നു. കുരങ്ങന്മാർ മണി അടിച്ചു കൊണ്ടിരുന്നു. ഈ ശബ്ദം കേട്ട് ഗ്രാമവാസികൾ ഭയന്നുപോയി. അവർ രാജാവിനോട് പരാതി പറഞ്ഞു.
ഈ പ്രശ്നം പരിഹരിക്കാൻ രാജാവ് വലിയൊരു സമ്മാനം വാഗ്ദാനം ചെയ്തു. അപ്പോൾ ആ ഗ്രാമത്തിലെ ഒരു ബുദ്ധിമതിയായ അമ്മൂമ്മ കാട്ടിലേക്ക് പോയി. കുരങ്ങന്മാർ മണി കൊണ്ട് കളിക്കുന്നത് കണ്ട അമ്മൂമ്മ ഒരു പ്ലാൻ ഇട്ടു. അവർ മാർക്കറ്റിൽ നിന്ന് പഴങ്ങളും നിലക്കടലയും വാങ്ങി ഒരു കുട്ടയിൽ നിറച്ചു. മരത്തിന്റെ താഴെ ആ കുട്ട വെച്ച് അമ്മൂമ്മ അവിടെ കിടന്നു ഉറങ്ങുന്നതായി അഭിനയിച്ചു.
പഴങ്ങളുടെ മണം വന്നപ്പോൾ കുരങ്ങന്മാർ മരത്തിൽ നിന്നും താഴെ ഇറങ്ങി വന്നു. മണി കയ്യിലുണ്ടായിരുന്ന കുരങ്ങൻ പോലും മണി താഴെ വെച്ച് പഴം കഴിക്കാൻ ശ്രമിച്ചു. ആ സമയം നോക്കി അമ്മൂമ്മ വേഗത്തിൽ മണി എടുത്തു കൊണ്ടുപോയി. അമ്മൂമ്മയുടെ ബുദ്ധിയിൽ സന്തോഷിച്ച രാജാവ് അവർക്ക് വലിയ സമ്മാനം നൽകി.
Moral
ബുദ്ധിയുപയോഗിച്ചാൽ ഏത് വലിയ പ്രശ്നവും പരിഹരിക്കാം.
